Library · yue

哥林多後書 9

幫助同道

1 關於接濟猶太聖徒嘅事,我不必寫信俾你哋。

2 我知道你哋係願意出力,為噉曾向馬其頓人誇耀你哋嘅慷慨。我話:「亞該亞嘅一班兄弟從去年就有咗準備。」你哋嘅熱心已經感動好多人。

3 現今我打發呢幾位兄弟去,希望你哋好似我講嘅早已將捐款準備好,使我哋喺此事上稱讚你哋嘅話唔落空。

4 假如有馬其頓人同我哋一齊去,發現你哋並冇準備好,我哋就會好難為情,因為對你哋太相信。至於你哋會覺得慚愧,就更唔使講咯!

5 因此,我認為必要打發呢幾位兄弟先去你哋處,將你哋答應嘅捐款收齊,等我到時都預備好;噉樣可以表示你哋嘅捐助係出於甘心樂意,唔係出於勉强。

6 要記住:少種嘅少收;多種嘅多收。

7 所以,每人都應該照自己嘅心願捐助,唔猶豫,唔勉強,因為上帝喜歡樂意奉獻嘅人。

8 上帝會更加豐富賜俾你哋,使你哋唔單只自己充足有餘,而且能喺各樣善事上出力。

9 好似聖經話:「佢慷慨救濟窮人;佢嘅仁義存到永遠。」

10 嗰位賜種俾撒種嘅,又賜食物俾人食嘅上帝,亦必將你哋需要嘅種賜俾你哋,又使佢長大,使你哋嘅義結出豐富嘅果子。

11 佢亦使你哋富足,隨時有慷慨施捨嘅能力,使好多人因為從我哋手上接受你哋嘅禮物而感謝上帝。

12 因為你哋嘅捐助唔單只供應聖徒嘅需要,亦使好多人更加流露對上帝嘅感謝。

13 呢件慈善工作係一種證據,使好多人知道你哋對基督順服,對所宣認嘅福音忠誠,亦能慷慨救濟別人,佢哋就會將一切榮耀歸俾上帝。

14 佢哋亦要因為上帝將極大嘅恩典賜俾你哋而更愛慕你哋,熱切為你哋禱告。

15 我哋要感謝上帝!佢有無法形容嘅恩賜!