Library · yue

加拉太書 3

律法或信心

1 無知嘅加拉太人呀!邊個迷惑你哋呢?耶穌基督被釘死喺十字架上嘅事,喺你哋眼前係好明顯嘅?

2 我哋只要問一件事:你哋受聖靈係靠遵行律法,抑或係透過聽信福音呢?

3 你哋點解咁無知呢?你哋係從接受聖靈開始,現今竟想靠自己嘅能力去完成咩?

4 你哋以往一切嘅經驗係徒然嘅咩?絕對唔係!

5 上帝賜聖靈俾你哋,又喺你哋中行各樣神蹟,係因為你哋遵行律法?抑或係因為你哋聽信福音呢?

6 好似聖經提到亞伯拉罕時話:「佢信上帝,因佢嘅信,上帝認佢為義人。」

7 所以,你哋要知,有信嘅人就係亞伯拉罕嘅真子孫。

8 聖經預先睇到,上帝要使異邦人因信稱義,所以早已將此福音傳俾亞伯拉罕,話:「萬民必因你蒙上帝賜福!」

9 亞伯拉罕信,因而蒙福;噉樣,一切信嘅人亦必與佢一同蒙福!

10 凡藉遵守律法嘅人都係活喺咒詛之下。因為聖經話:「所有唔喺每一件事遵守律法書一切規條嘅人就受上帝咒詛。」

11 可見冇人能靠遵守律法而稱義;因為聖經話:「因信而稱義嘅人必得生。」

12 但,律法嘅基礎並唔係信,好似聖經話:「遵守法律嘅人,就能生。」

13 基督已經為我哋承擔咒詛,救贖我哋脫離律法嘅咒詛;因為聖經話:「所有被掛喺木上嘅人都受上帝咒詛。」

14 基督噉樣做嘅目的係要使異邦人因基督耶穌獲得上帝應許俾亞伯拉罕嘅福;等我哋能因信而領受上帝所應許嘅聖靈。

律法同應許

15 兄弟呀,我從日常生活裏舉例:當兩人同意,並簽契約,冇人能違約或有所增減。

16 同樣,上帝已經向亞伯拉罕同佢嘅子孫立應許。聖經並冇用「向眾子孫」,指多數嘅人,而係用「向你嘅子孫,」指一個人,即係基督。

17 我就話:上帝立約,而且答應守約。喺四百三十年後出現嘅律法不能破壞此約,取消上帝嘅應許。

18 若上帝賜嘅約係根據律法,就唔係靠應許;但上帝賜恩俾亞伯拉罕係根據應許。

19 噉樣,律法嘅目的係乜嘢呢?律法係為指出過犯而設,直到嗰個應許俾亞伯拉罕嘅子孫嚟到致結束。律法係由天使藉中保之手而設嘅。

20 但屬於單方面嘅事就無需中保,而上帝只有一位。

律法嘅目的

21 照噉樣講,律法同上帝嘅應許相抵觸咩?絕對唔係!若律法嘅頒佈能俾人帶嚟生命,人就可以靠律法而稱義。

22 但,聖經話,全世界都喺罪嘅權勢下,使信耶穌基督成為領受上帝應許嘅根據;此應許係賜俾所有信嘅人。

23 但,「信」嘅時代未嚟之前,律法看守住我哋,好似看守囚犯一樣,直到「信」被顯示出嚟。

24 噉樣,律法成為我哋嘅監護人,直到基督嚟,目的係使我哋因「信」稱義。

25 既然現今係「信」嘅時代,律法就唔再監護我哋。

26 你哋眾人都因「信」,同基督耶穌合而為一,成為上帝嘅仔女。

27 你哋受洗,同基督合而為一,好似着上基督,有佢嘅生命。

28 唔分猶太人或異邦人,奴隸或自由人,男人或女人,喺基督耶穌嘅生命裏,你哋都成為一體。

29 若你哋係屬基督嘅,你哋就係亞伯拉罕嘅後代,會領受上帝俾亞伯拉罕嘅應許。