加拉太書 4
1 重有,繼承父親產業嘅仔,雖然所有嘅產業都係佢嘅,但未成年時,佢同奴僕冇分別。
2 喺佢年幼時,有人照顧佢,替佢管理業務,等佢父親為佢所定嘅日子到。
3 同樣,喺靈性幼稚時,我哋亦受世俗權力儀式嘅支配。
4 但係時機成熟,上帝就打發自己嘅仔,由女人所生,活喺律法下,
5 要救贖活喺律法下嘅人,使我哋得以成為上帝嘅仔女。
6 表明你哋係佢嘅仔女,上帝就打發佢子之靈進入我哋嘅心,呼叫:「阿爸﹗父呀!」
7 噉樣,你唔再係奴僕,而係仔;既然係上帝嘅仔,上帝就將你當做繼承人。
保羅關懷加拉太人8 過去你哋唔認識上帝,被嗰啲唔係神嘅神明奴役。
9 現今你哋認識上帝(或者話,已經被上帝所認識),點解又要返去搵嗰啲無能無用嘅權力呢?點解重要去做佢哋嘅奴隸呢?
10 你哋竟然死守某啲日子、月份、節期、年份﹗
11 我為你哋擔憂,只怕從前我喺你哋處嘅工作全都落空。
12 兄弟呀,我勸你哋,要認同我嘅立場,因為我曾認同過你哋嘅立場。你哋並冇做過對唔住我嘅事。
13 你哋知道,因為我身體有病,我致有第一次向你哋傳福音嘅機會。
14 雖然我嘅病況使你哋困擾,但係你哋並冇厭煩我,丟棄我。反轉,你哋接待我,好似接待上帝嘅天使,接待基督耶穌。
15 當時你哋極高興,現今又點樣呢?我可以話,嗰時,你哋即使將自己嘅眼挖出嚟俾我亦係願意!
16 現今我用誠實待你哋,反成為你哋嘅敵人咩?
17 嗰啲人對你哋表示熱情,係不懷好意。佢哋嘅目的係要將我孤立,等你哋對佢哋表示熱情。
18 喺善事上熱心係好,但唔可以只限於我與你哋同在時致噉樣。
19 小子呀!我再一次好似母親為你哋忍受生產嘅痛苦,直到基督嘅特性喺你哋生命裏成形。
20 我渴望現今就同你哋喺一齊,等我用另一種態度嚟對待你哋。為你哋,我心裏困惑不安!
夏甲同撒拉嘅例子21 我向嗰啲願意生活喺律法之下嘅人提出一個問題:你哋冇聽見摩西嘅律法咩?
22 律法書記載,亞伯拉罕有兩個仔,一個係由婢女生嘅,另一個係由自由嘅女子生嘅。
23 從婢女生嘅係依血氣而生;由自由嘅女子生嘅係出於上帝嘅應許。
24 呢啲可以作比喻:嗰兩個女人代表兩約。其中之一係夏甲,佢嚟自西乃山,所生嘅奴隸。
25 夏甲係指喺亞拉伯嘅西乃山,象徵今日嘅耶路撒冷;佢同佢嘅仔女生活喺奴役裏。
26 但係天上嘅耶路撒冷係自由嘅;佢係我哋嘅母親。
27 因為聖經記載:不能懷孕、冇生產過嘅女子呀,你要歡樂!未經歷過生產痛苦嘅女子呀,你要高聲歡呼!因為被冷落嘅女人比同丈夫一齊生活嘅,會有更多嘅仔女!
28 兄弟呀,好似以撒一樣,你哋係由上帝嘅應許而成為佢嘅仔女。
29 嗰時,依住自然生嘅迫害聖靈所生嘅;現今亦係噉樣。
30 但係聖經點樣講呢?聖經話:「將婢女同佢嘅仔趕出去,因為婢女嘅仔唔可以同自由女子生嘅仔一齊繼承產業。」
31 所以,兄弟呀,我哋並唔係婢女嘅仔女,而係自由女子所生嘅。