Library · yue

腓利比書 2

以基督為榜樣

1 我問,你哋喺基督裏嘅生命有冇使你哋堅強起嚟?佢嘅愛有冇鼓勵你哋?你哋同聖靈有冇團契?你哋彼此間有冇親愛同情嘅心?

2 若有,我就求你哋,要有共同目標,同樣嘅愛心,相同嘅情感,同一致嘅想法,使我充滿喜樂。

3 唔好自私自利,貪圖虛名,要彼此謙讓,睇他人比自己高明。

4 唔好只顧自己,亦要關心他人嘅利益。

5 你哋要以基督耶穌做榜樣:

6 佢原本有上帝嘅本質,但冇濫用同上帝同等嘅特權。

7 相反,佢自願放棄一切,取奴僕形狀。做人,以人嘅形體出現。

8 佢自甘卑微,順服至死,且死喺十字架上。

9 為噉,上帝高舉佢,達於至高,賜俾佢超越萬名嘅名號。

10 為要尊崇耶穌嘅名,天上、人間,同地底下嘅眾生都要向佢下拜,

11 眾口要宣認:耶穌基督係主,同頌父上帝嘅榮耀。

世上嘅光

12 親愛嘅朋友呀,我與你哋同在時你哋常時聽從我;現今我唔喺你哋處,你哋更應該聽從我。要戰戰兢兢,不停努力去完成你哋自己嘅得救。

13 因為上帝常時喺你哋心裏工作,使你哋立志實行佢美善嘅旨意。

14 你哋無論做乜嘢事都唔好埋怨或爭論,

15 使你哋純潔無邪,喺呢個腐敗、彎曲世代中,成為上帝冇缺點嘅仔女。你哋要喺世人中發光,好似星照耀天空,

16 將生命嘅道傳俾佢哋。你哋噉樣做,喺基督再嚟嘅日子,我就有所誇,因為呢啲可以證明我一切辛勞嘅唔係白費。

17 即使我用自己嘅血做奠祭,灌喺你哋用信心獻俾上帝嘅祭品上,我亦喜樂,而且要同你哋分享我嘅喜樂。

18 同樣,你哋要喜樂,亦等我分享你哋嘅喜樂。

提摩太同以巴弗提

19 我仰賴主耶蘇,希望冇幾耐能打發提摩太去你哋處,使我能聽到你哋嘅消息而獲得安慰。

20 佢係惟一與我同心,並且真正關心你哋嘅人。

21 人哋只為自己打算,唔關心耶穌基督嘅事。

22 但係提摩太嘅為人,你哋都好清楚,佢同我嘅關係好似仔同父,為福音工作一齊勞苦。

23 我希望,當我一知道我嘅事情有乜嘢結局,就即刻打發佢去睇你哋。

24 我深信主會使我喺短期內親自嚟睇你哋。

25 我想,我應該送我哋嘅兄弟以巴弗提返去你哋處。你哋選派佢嚟幫助我,同我一齊工作,一齊打仗。

26 佢好想念你哋各位,並且因知你哋聽見佢生病嘅消息而好難過。

27 佢真係有病,幾乎死。但上帝憐憫佢,唔單只憐憫佢,亦憐憫我,使我冇遭受更大嘅憂傷。

28 所以,我更想盡速送佢返去,使你哋能高高興興與佢團聚;噉樣亦可以消除我嘅憂傷。

29 我希望你哋喺主裏歡歡喜喜接待佢,你哋要尊重好似佢噉樣嘅人;

30 因為佢為基督嘅工作冒生命嘅危險,幾乎死,為要彌補你哋未能服事我嘅地方。