歌羅西書 2
1 我希望你哋知道,為你哋同老底嘉人,同好多仍未見過面嘅人,我盡心盡力噉做。
2 係想佢哋得到鼓勵,用愛心團結,以致喺悟性中有豐富充足嘅信心,嚟認識上帝嘅奧祕;此奧祕就係基督本身。
3 佢係打開上帝儲藏嘅一切智慧同知識嘅鎖匙。
4 我講呢啲,免致你哋被任何人用花言巧語引你哋入歧途。
5 雖然我嘅身體唔喺你哋處,我嘅心係同你哋喺一齊。我好高興,能睇見你哋循規蹈矩,並且對基督嘅信仰有堅固嘅基礎。
喺基督裏完整嘅生命6 既然你哋接受基督耶穌做主,你哋嘅生活必要以佢做中心,
7 喺佢裏面扎根,生長,建立信心;正如你哋所受嘅教訓。你哋亦要有充滿感謝嘅心。
8 你哋要謹慎,唔好被虛妄嘅哲學迷住;因為嗰種學說係人所傳授嘅,係根據宇宙間所謂星宿之靈,而唔係根據基督。
9 因為上帝完整嘅神性具體都喺基督裏面,
10 你哋同基督連結,亦得到豐盛嘅生命。佢係元首,超越一切靈界嘅執政者同掌權者。
11 你哋已經喺基督嘅生命裏受割禮;此割禮唔係人為嘅,係佢使你哋由人嘅罪性釋放出嚟嘅割禮。
12 因為,你哋受洗時,係同基督一齊埋葬;亦藉信使佢復生嘅上帝嘅大能同佢一齊復生。
13 從前,你哋喺靈性上係死嘅;因為你哋有罪,又因為你哋係冇律法嘅異邦人。但係,上帝使你哋同基督一齊復生。佢赦免咗我哋一切嘅過犯,
14 取消咗嗰啲對我哋不利、律法上束縛我哋罪債記錄,將佢撤去釘喺十字架上。
15 喺十字架上,基督親自戰勝嗰啲靈界執政同掌權者嘅權勢,將佢哋當做凱旋行列中嘅俘虜,公開示眾。
16 所以,唔好俾人喺你哋飲食、節期、月朔,或安息日嘅問題上用條例束縛你哋。
17 呢一切不過係將來之事嘅影;基督先致係實體。
18 唔好俾嗰啲堅持有特殊遠見、故作謙虛、崇拜天使嘅人使你哋喪失得獎嘅機會。佢哋隨住人嘅幻想,無故狂妄自大,
19 同元首基督斷咗聯繫。其實,只有由身體嘅頭,即係基督,成個身體致能夠得到滋養,藉住關節筋絡,互相連結,照上帝嘅旨意逐漸生長。
共基督同生死20 既然你哋共基督同死,脫離世上嘅概念,你哋點解仍然同世俗嘅人一樣生活,繼續守「不可拎,不可食,不可摸」呢一類嘅禁忌呢?
21 拼於上節
22 呢啲無非係人嘅規例同教訓嘅產物,喺用嘅時候就顯得係無用嘅。
23 由表面睇,崇拜天使、故作謙虛、苦待自己身體等等,似乎係明智之舉,其實,對於抑制肉體嘅情慾係一啲價值都冇嘅。