雅各書 3
控制自己條脷1 我嘅兄弟呀!你哋唔應該想做教師,因為做教師嘅要比其他人受更嚴重嘅審判。
2 我哋常時犯錯;邊個喺言語上冇過錯嘅就係一個完全人;佢能控制自己。
3 我哋將嚼環放喺馬口,使佢馴服,使佢到我哋要去嘅地方。
4 再睇,一隻船雖然大,喺大風嘅吹襲下,只用一個細細嘅舵操縱,就可以隨住舵手嘅意思,使船向目的地行。
5 同樣,條脷雖然細小,能講誇大嘅話。再舉一個例:星星之火係可以燒大樹林。
6 好似火一樣,脷喺我哋嘅肢體裏係邪惡嘅源頭,會污染全身;佢透過地獄嘅火燒毀我哋整個人生嘅路程。
7 人能制伏野獸、飛禽、昆蟲,同水族;其實,佢已經制伏各類動物。
8 但,人從來不能制伏條脷;佢係控制唔到嘅邪惡,充滿致命嘅毒氣。
9 我哋用條脷感謝我哋嘅主、我哋嘅天父,亦用條脷咒詛上帝照自己嘅形像造出嘅人。
10 感謝同咒詛由一口出!兄弟呀,呢啲係好唔應該嘅!
11 由一泉源能湧出甜同苦兩種水咩?
12 兄弟呀,無花果樹不能生橄欖;葡萄樹不能生無花果;鹹嘅水源亦流唔出甜嘅水。
從天上嚟嘅智慧13 你哋中有聰明智慧嘅人咩?佢就應該用充滿謙卑同智慧嘅好行為表現佢有美好嘅生活。
14 既然你哋心有嫉妒、怨恨,同自私,你哋就唔好自誇,唔好講大話抵擋真理。
15 你哋嘅所謂智慧唔係從天嚟嘅,而係屬世,屬情慾,屬魔鬼嘅。
16 凡有嫉妒同自私,就有紛亂同各種邪惡。
17 從上嚟嘅智慧有幾樣特徵:第一係純潔,其次係和平、謙和、友善,充滿仁慈,能結出豐富嘅善果,冇偏私,冇虛偽。
18 一切正義嘅果都係由播種和平嘅人,為和平努力撒嘅種産生出嚟嘅。