Library · yue

彼得前書 3

妻同丈夫

1 做妻嘅,要順服自己嘅丈夫,使冇接受真道嘅丈夫能因你哋嘅好品行受感化。你哋唔使多講,

2 因為佢哋會睇見你哋純潔同端莊嘅品行。

3 你哋唔使靠打扮嚟妝飾自己,或外面嘅辮髮,帶乜嘢珠寶飾物,着乜嘢衫。

4 你哋應該有內在嘅美,用唔會衰退嘅溫柔嫻靜做妝飾;呢啲喺上帝眼中係最有價值嘅。

5 因為,從前仰望上帝聖潔嘅婦女亦以服從丈夫嚟妝飾自己。

6 撒拉亦係噉樣;佢服從亞拉伯罕,叫佢做「主人」。你哋若有好行為,唔因恐嚇而驚,你哋就係撒拉嘅女。

7 做丈夫嘅,你哋同妻一齊生活,亦應該體貼佢哋喺性別上比較軟弱。要尊重佢哋,因為佢哋同你哋一樣要領受上帝賜生命之恩。能夠噉樣,你哋嘅禱告就不至於受阻礙。

為義受苦難

8 總括嚟講:你哋要同心,互相同情,好似兄弟咁親愛,用仁慈謙讓相待。

9 唔好以惡報惡,亦唔好用辱駡還辱駡;要用祝福回報,因為上帝呼召你哋嘅目的係要賜福俾你哋。

10 好似聖經所講:邊個愛生命想享受人生嘅樂趣,希望過好日子,就要禁止條脷講壞話,及口講大話。

11 佢應該離惡行善,一心追求和平。

12 因為上帝照顧義人,垂聽佢哋嘅禱告;佢要向作惡嘅人反面。

13 若你哋熱心行善,邊個會危害你哋呢?

14 即使為義受苦,亦係有福!唔好怕人嘅威脅,亦唔好驚。

15 要有敬畏基督嘅心,以佢為主。有人要求你哋解釋心中嘅盼望,要隨時準備回答;

16 但係要用謙恭溫和嘅態度回答。要有清白嘅良心,使侮辱你哋、對你哋作為基督徒表現嘅好行為亂噉詆毀嘅人,自己覺得慚愧。

17 若行善而受苦係出於上帝嘅旨意,總比作惡而受苦好得多。

18 因為基督曾一次為罪人死,係義嘅代替不義嘅,將你哋帶到上帝面前。佢嘅肉體被處死,但佢嘅靈係生。

19 佢曾以此靈傳道俾喺監裏嘅靈。

20 此靈係喺挪亞造方舟時,上帝耐心等候唔信從神嘅人嘅靈。當時入方舟嘅人唔多,只有八個,佢哋從水裏得救;

21 此水係預表洗禮。此洗禮現今拯救你哋,唔係洗去你哋身體嘅污穢,而係用清白嘅良心向上帝許願;此洗禮由耶穌基督嘅復生拯救你哋。

22 耶穌基督已升上天,現今喺上帝嘅右邊,統轄所有天使同執政掌權嘅。