Library · yue

彼得前書 4

生活嘅改變

1 既然基督喺肉身受苦,你哋亦應該用同樣嘅意志裝備自己,因為喺肉身受過苦嘅人已經同罪惡斷絕。

2 從今以後,你哋喺世上剩落嘅日子要受上帝旨意嘅管束,唔再被人嘅慾望控制。

3 從前你哋浪費光陰,做異教徒喜歡做嘅事,生活喺淫亂、緃慾、醉酒、宴樂、狂飲,同可憎惡嘅偶像崇拜嘅事。

4 現今你哋唔再同佢哋過放蕩、冇節制嘅生活,佢哋覺得好奇怪,為噉就侮辱你哋。

5 佢哋必要向審判生人同死人嘅上帝交帳。

6 為此,福音亦曾傳俾死人,俾佢哋同其他嘅人一樣喺肉身受審判,等佢哋嘅靈能同上帝一樣生活。

做上帝恩賜嘅經理

7 萬事嘅結局近咯。你哋要謹慎自守,警醒禱告。

8 最重要嘅係要彼此真誠相愛,因為愛能消除好多罪過。

9 要彼此殷勤接待,唔好埋怨。

10 既然每個人都係上帝各樣恩賜嘅好經理,就要照所領受嘅各種恩賜,彼此服事。

11 若有宣講嘅,就要宣講上帝嘅話;服事嘅,就要照上帝所賜嘅力量嚟服事,使萬事都由耶穌基督歸榮耀上帝。願榮耀同權能都歸佢,直到永遠!阿們。

忍受苦難嘅基督徒

12 親愛嘅朋友呀,你哋遇到火一樣嘅考驗,唔好以為奇怪,好似遇到好唔平常嘅事。

13 你哋應該認為分擔基督嘅苦難係一件樂事,等喺佢榮耀顯現時得到充分嘅喜樂。

14 你哋若因跟從基督而受侮辱,就有福;呢啲表示榮耀嘅聖靈,即係上帝嘅靈,常住喺你哋身上。

15 你哋中唔應該有人因為兇殺,做賊,犯刑事案,或好管閒事而受苦。

16 若受苦係由於做基督徒,唔好引以為恥,反要因基督嘅名榮耀上帝。

17 到審判時,上帝家嘅仔女要先受審判。若審判要從我哋開始,噉樣,唔信上帝福音嘅人會有乜嘢結局呢?

18 好似聖經所講:義人得救已經唔容易,唔敬虔嘅罪人又點樣呢?

19 所以,由上帝嘅旨意而受苦難嘅人,應該不停以好行為嚟表示完全信賴嗰位始終信實嘅創造主。