Library · yue

約翰壹書 2

基督替我哋求情

1 小子呀,我寫呢啲等你哋唔犯罪;若有人犯罪,我哋有一位公義嘅耶穌基督,替我哋向父求情。

2 基督犧牲自己,救贖我哋嘅罪;佢唔單只為我哋嘅罪,亦為全人類嘅罪犧牲自己。

3 若我哋遵守上帝嘅命令,就知道我哋認識佢。

4 若有人話:「我認識佢」,但唔遵守佢嘅命令,噉樣嘅人係講大話嘅,真理唔在佢心中。

5 凡遵守上帝道嘅人,佢對上帝嘅愛就達到完全。凡話佢有上帝嘅生命嘅,應該照耶穌基督嘅言行生活;噉樣,我哋致有把握話,我哋有佢嘅生命。

6 拼於上節

新嘅命令

7 親愛嘅朋友呀,我寫俾你哋嘅,唔係新嘅命令,係舊嘅命令,係你哋一開始就領受嘅。呢條命令係你哋已經聽過嘅信息。

8 但係,我寫俾你哋嘅,亦算係新嘅命令;此命令嘅真理喺基督身上,亦喺你哋處表現出嚟。因為黑暗正在消逝,真光已經開始照耀。

9 若有人話佢生活喺光明中,但恨自己嘅兄弟,佢仍然係喺黑暗中。

10 愛兄弟嘅,係生活喺光明中,佢唔會使人哋失足犯罪。

11 但係,凡恨兄弟嘅,係喺黑暗中;佢喺黑暗中行,唔知自己去邊處,因為黑暗令佢眼盲。

12 小子呀,我寫信俾你哋,因為你哋嘅罪已經因基督嘅名得到赦免。

13 父老呀,我寫信俾你哋,因為你哋認識嗰位從太初就已經存在嘅。少年人呀,我寫信俾你哋,因為你哋已經勝咗嗰個邪惡者。

14 小子呀,我寫信俾你哋,因為你哋認識天父。父老呀,我寫信俾你哋,因為你哋認識嗰位從太初就已經存在嘅。少年人呀,我寫信俾你哋,因為你哋強壯;上帝嘅道常存在你哋生命中,你哋亦已經勝咗嗰個邪惡者。

15 唔好愛世界,或任何屬世嘅嘢。若你哋愛世界,你哋就冇愛父嘅心。

16 一切屬世嘅事物,如肉體嘅慾望、眼目嘅慾望,及一切虛榮,都唔係從父來嘅,係從世界來嘅。

17 此世界同一切屬世嘅慾望都要消逝;但實行上帝旨意嘅人就永遠生存。

基督嘅敵對者

18 小子呀,世界嘅終局就快到!你哋曾聽講過敵基督者要來;現今好多基督嘅仇敵已經出現,我哋就知道終局快到咯。

19 佢哋唔係屬我哋嘅,所以離開我哋;若佢哋係屬我哋嘅,就會同我哋喺一齊。但係,佢哋離開我哋,顯明佢哋唔係屬我哋嘅。

20 你哋已經從基督領受聖靈,所以你哋都識得真理。

21 我寫信俾你哋,唔係因為你哋唔認識真理,正係因為你哋都認識,而且知道一切虛謊都唔係出自真理。

22 噉樣,邊個係講大話嘅呢?豈唔係嗰個否認耶穌係基督嘅咩?噉樣嘅人係敵對基督嘅;佢拒絕父,亦拒絕子。

23 所有拒絕子嘅,就拒絕父;所有公開承認子嘅,就連父都有。

24 你哋必要謹守當初聽到嘅信息。若你哋謹守當初聽到嘅信息,你哋就會常時活喺子同父嘅生命中。

25 基督親自應許俾我哋嘅就係永生。

26 我寫嘅係指嗰啲想欺騙你哋嘅人講嘅。

27 至於你哋,基督已經將佢嘅靈賜俾你哋。只要佢嘅靈與你哋同在,你哋就唔需要人哋嘅教導;因為佢嘅靈將一切嘅事教導你哋,佢嘅教導係真嘅,唔係假嘅。所以,你哋要順從聖靈嘅教導,始終活喺基督嘅生命中。

28 小子呀,你哋要活喺佢嘅生命中;噉樣,喺佢顯現、再來時,我哋可以坦然無懼,亦唔致羞慚。

29 你哋知道基督係公義嘅;就應該知道,遵行公義嘅人就係上帝嘅仔女。