約翰壹書 4
真靈同假靈1 親愛嘅朋友呀,對於自稱有聖靈嘅,你哋唔好盡信,總要察驗佢哋嘅靈係唔係出於上帝,因為已經有好多偽先知到處出現。
2 你哋點樣分辨上帝嘅靈呢?所有公開承認耶穌道成肉身,就有從上帝來嘅靈。
3 所有唔公開承認耶穌,就冇從上帝來嘅靈;佢所有嘅係敵基督者嘅靈。你哋從前聽聞此靈要來,現今已經喺世上。
4 小子呀,你哋係屬上帝嘅,而且已經勝咗偽先知,因為喺你哋心中嘅靈比嗰個喺屬世界嘅人心中嘅靈更有力量。
5 佢哋講論世上嘅事,世人聽從佢哋,因為佢哋係屬世嘅。
6 但係,我哋係屬上帝嘅。認識上帝嘅人聽從我哋;唔屬上帝嘅人唔聽從我哋。憑呢點,我哋知道點樣分辨真理嘅靈同謬妄嘅靈。
上帝係愛7 親愛嘅朋友呀,我哋要彼此相愛,因為愛係由上帝來嘅。所有有愛嘅,都係上帝嘅仔女,而且認識上帝。
8 所有冇愛嘅,就唔認識上帝,因為上帝係愛。
9 上帝打發佢嘅獨生子到世上,使我哋透過佢得到生命;上帝用呢種方法顯示佢愛我哋。
10 唔係我哋愛上帝,而係上帝愛我哋,打發佢嘅仔,為我哋犧牲,贖我哋嘅罪,呢啲就係愛咯。
11 親愛嘅朋友呀,既然上帝噉樣愛我哋,我哋亦應該彼此相愛。
12 從來未有人見過上帝,若我哋彼此相愛,上帝就喺我哋嘅生命中,而佢嘅愛透過我哋完全實現。
13 上帝將佢嘅靈賜俾我哋,為噉我哋知道,我哋有佢嘅生命,而佢喺我哋嘅生命中。
14 父打發佢嘅仔嚟做世界嘅救主;此事我哋睇見,而且向他人作證。
15 所有公開承認耶穌係上帝之子嘅,上帝就喺佢嘅生命中,佢亦有上帝嘅生命。
16 我哋知道,而且相信上帝愛我哋。上帝係愛;所有有愛喺佢生命中嘅人就係上帝嘅生命,而上帝亦喺佢嘅生命中。
17 噉樣,愛就透過我哋,完全實現,使我哋喺審判日能放膽無懼;因為我哋喺世上有同基督一樣嘅生命。
18 有咗愛就冇恐懼;完全嘅愛除去一切嘅恐懼。所以,人有恐懼嘅就冇完全嘅愛,因為恐懼同刑罰係相關連嘅。
19 我哋愛,因為上帝先愛我哋。
20 若有人話「我愛上帝」,但恨佢嘅兄弟,佢就係講大話嘅;佢既然唔愛睇得見嘅兄弟,點能愛睇唔見嘅上帝呢?
21 所以,基督命令我哋:所有愛上帝嘅,亦當愛佢嘅兄弟。